Surat Varacha News: અશ્વિનીકુમાર રોડ પર આવેલા એક પાન ના ગલ્લામાંથી 90 હજાર રૂપિયાની ચોરી કરવામાં આવી હતી. બે તસ્કરો નાઇટ પેટ્રોલિંગની પોલીસની પીસીઆર વાન ગયા બાદ બે મિનિટમાં આ દુકાન સુધી પહોંચ્યા હતા અને ત્યારબાદ ઊંચું કરીને અંદર એક પ્રવેશ્યો હતો જ્યારે બીજો બહાર વોચ રાખી રહ્યો હતો. દુકાનમાં પ્રવેશ કરનાર એક તસ્કરનું પેન્ટ પણ ખુલી ગયું હતું. ત્યારબાદ સીસીટીવી હોવાની જાણ થતા તેને નીચા કરીને ચોરીને અંજામ આપ્યો હતો.
મળતી માહિતી પ્રમાણે વરાછાના અશ્વિનીકુમાર રોડ પર શ્યાની હાઈટ્સ નામની બિલ્ડીંગ આવેલી છે જેમાં નીચે અમિત ભાઈ સબરસ પાનનો ગલ્લો ચલાવે છે. ગત રાત્રિના એક વાગ્યા આસપાસ બે જેટલા તસ્કરોએ તેમની દુકાન ને નિશાન બનાવી ચોરીને અંજામ આપ્યો હતો. એક વાગ્યા આસપાસ આ બંને તસ્કરો પોલીસની નાઈટ પેટ્રોલિંગની પીસીઆર વાન ગયા બાદ બે જ મિનિટમાં આ દુકાન સુધી પહોંચ્યા હતા.
દુકાન ખાતે અડધો કલાક સુધી બેસી રહ્યા હતા અને ત્યારબાદ તકનો લાભ ઉઠાવી દુકાનનું શટર ઊંચું કર્યું હતું. ત્યારબાદ એક પાતળો તસ્કર દુકાનની અંદર નીચેથી ગળકીને પ્રવેશ્યો હતો. જેમાં તેનું પેન્ટ પણ ખુલી ગયું હતું. જેથી તેણે અંદર પ્રવેશ્યા બાદ પહેલા પેન્ટની ક્લિપને બંધ કરી હતી અને દુકાનમાં સીસીટીવી હોવાની જાણ થતા ચહેરા પર રૂમાલ બાંધી દીધો હતો. ત્યારબાદ દુકાનમાં રહેલા સીસીટીવીને ઊંધા કરી નાખ્યા હતા.
દુકાનની અંદર રહેલા 74 હજાર રોકડા એક સ્માર્ટ વોચ સહિતનો 90,000નો મુદ્દા માલ ચોરીને બંને તસ્કરો બે વાગ્યા આસપાસ ભાગી ગયા હતા. અશ્વિનીકુમાર સ્મશાન તરફથી આવીને આ ચોરીને અંજામ આપ્યો હતો અને ત્યારબાદ તે ફરી એ તરફ જ તા રહ્યા હતા. સવારે છ વાગ્યે દુકાનના માલિક પહોંચતા ચોરી થઈ હોવાની જાણ થઈ હતી ત્યારબાદ વરાછા પોલીસને જાણ કરી હતી. હાલ વરાછા પોલીસે સીસીટીવી આધારે વધુ તપાસ હાથ ધરી છે અને ફરિયાદ નોંધવાની તજવીજ હાથ ધરી છે.
