સંઘર્ષ, સાહસ અને સફળતાનો સમન્વય એટલે સુરતનો ૨૦ વર્ષીય શુટીંગ માસ્ટર મોહમ્મદ વાનિયા:જન્મજાત ક્ષતિને બનાવી હિંમત અને બન્યો દેશનું ગૌરવ
સંઘર્ષ, સાહસ અને સફળતાનો સમન્વય એટલે સુરતનો ૨૦ વર્ષીય શુટીંગ માસ્ટર મોહમ્મદ વાનિયા:જન્મજાત ક્ષતિને બનાવી હિંમત અને બન્યો દેશનું ગૌરવ
મોહમ્મદ વાનિયાએ ડેફ ઓલમ્પિક ટોકિયો-૨૦૨૫ની ૧૦મી એર રાઈફલ શુટીંગ સ્પર્ધામાં વ્યક્તિગત અને મિક્સમાં સિલ્વર તેમજ કાંસ્ય પદક જીતી દેશને અપાવ્યું ગૌરવ
આંતરરાષ્ટ્રીય, રાષ્ટ્રીય અને રાજ્ય કક્ષાએ ૧૩ ગોલ્ડ, ૧૨ સિલ્વર અને ૮ બ્રોન્ઝ મેડલ મેળવનારા મોહમ્મદનો એકમાત્ર પ્રેરણાસ્ત્રોત માતા-પિતા
કેન્દ્રીય જળશક્તિ મંત્રી સી.આર.પાટીલે શુભેચ્છા પાઠવી
દેશ માટે મેળવેલું આ મેડલ મારું અને મારા પરિવારનું સૌથી કિંમતી ઘરેણું છે: મોહમ્મદ વાનિયા
“દેશ માટે મેળવેલું આ મેડલ મારું અને મારા પરિવારનું સૌથી કિંમતી ઘરેણું છે.” અત્યંત ઉત્સાહ સાથે ઓલમ્પિક મેડલ બતાવતા સુરતના ઓલમ્પિક ચેમ્પિયન મોહમ્મદ વાનિયાએ હર્ષભેર જણાવ્યું. જન્મથી મુકબધિર સુરતના ૨૦ વર્ષીય મોહમ્મદે હાલમાં જ ડેફ ઓલમ્પિક ટોકિયો-૨૦૨૫ની ૧૦મી એર રાઈફલ શુટીંગ સ્પર્ધામાં વ્યક્તિગત અને મિક્સમાં સિલ્વર તેમજ કાંસ્ય પદક જીતી દેશને ગૌરવ અપાવ્યું છે, અને વૈશ્વિક સ્તરે દેશનું નામ રોશન કરવા માટે કેન્દ્રીય જળશક્તિ મંત્રી સી.આર.પાટીલે તેમને શુભેચ્છા પાઠવી હતી.
CHASING THE CHALLENGES… અને એ પણ જન્મથી. સુરતના મોહમ્મદ વાનિયા માટે આમ કહેવું જરાય ખોટું નથી. જન્મથી મુકબધિર મોહમ્મદનું ૪ વર્ષની વયે કોકલીયર ઈમ્પ્લાન્ટનું ઓપરેશન થયું. સામાન્ય રીતે જન્મથી સંભળાતા અવાજો તેમણે ૪ વર્ષે પહેલી વાર સાંભળ્યા અને જે ઉંમરમાં બાળક પટપટ બોલીને આખું ઘર માથે લે, તે સમયે તેમણે પ્રથમ શબ્દ ઉચ્ચાર્યો. પણ કહેવાય છે ને, BETTER LATE THAN NEVER….બસ એ જ રીતે એક પછી એક પડકારોનો સામનો કરતા આગળ વધતા રહ્યા.
હાલ સુરતની સાર્વજનિક યુનિ.માં B.Sc ITના પ્રથમ વર્ષમાં અભ્યાસ કરતા દીકરાની યશગાથા વર્ણવતા માતા, રઝીયા વાનિયાએ કહ્યું કે, મોહમ્મદ પહેલેથી સ્પોર્ટ્સમાં ખુબ રસ ધરાવતો હતો. અને દરેક સ્પોર્ટ્સમાં શ્રેષ્ઠ દેખાવ કરતો હતો. પરંતુ બોલવાની ક્ષતિને કારણે તેનામાં આત્મવિશ્વાસની કમી હતી. જે દુર કરવા તેના પિતાએ નક્કી કર્યું કે તેને કોઈક સ્પોર્ટ્સમાં આગળ વધારીશું.
જે માટે મોહમ્મદે ટેબલ ટેનિસ, સ્વીમીંગ, રેસ જેવા વિવિધ સ્પોર્ટ્સમાં ઝંપલાવ્યું અને ખુબ સારો દેખાવ પણ કર્યો. પરંતુ ભારે શારીરિક કસરતો અને વાતાવરણની અનિશ્ચિતતાને કારણે ઘણી વાર કાનના મશીનમાં તકલીફ થતી હતી. જેથી વિકલ્પના રૂપે શુટીંગ પ્રત્યે તેની રુચીને ધ્યાને લઇ તેની પ્રેક્ટીસ શરુ કરી.
પ્રથમ પ્રયત્નમાં જિલ્લા કક્ષાએ જીતેલા ગોલ્ડ મેડલથી જ પોતાનો ધ્યેય નક્કી કરનાર મોહમ્મદ ખેલ મહાકુંભ અને હવે ૪ વર્ષની સખત મહેનત બાદ વૈશ્વિક સ્તરે ઓલમ્પિકસમાં સિલ્વર મેડલ મેળવી રાજ્ય અને દેશનું નામ રોશન કરી રહ્યો છે. તેના માટે જોયેલા અનેક સ્વપન સાકાર કરી તે અમારું પણ ગૌરવ વધારી રહ્યો છે. સાથે જ તેની સફળતામાં તેમના કોચ સાગર ઉખારેની ભૂમિકા પણ મહત્વની છે. એમ તેમણે ઉમેર્યું હતું.
પોતાની સફળતાનો શ્રેય માતા-પિતાને આપતા મોહમ્મદ કહે છે કે, હું નાનો હતો ત્યારથી જ મેં તેમને અનેક બલિદાનો આપતા જોયા છે. મારી વધુ સારી દેખભાળ માટે મમ્મીએ નોકરી છોડી દીધી અને પિતાએ સમય અને પૈસાનો ખુબ ભોગ આપ્યો છે. દરેક તબક્કે મારા પિતાએ મને શ્રેષ્ઠ પ્રદર્શન કરવા પ્રેરણા આપી અને એટલે જ હું આ મુકામ પર પહોંચી શક્યો છું. અને એટલે જ હું દરેકને દ્રઢ મનોબળ સાથે આગળ વધવાનો સંદેશો આપું છું.
