શિનોર તાલુકાની તમામ 31 સસ્તા અનાજની દુકાનો ત્રીજા દિવસે પણ બંધ
પરમિટ વિના વિતરણ અટક્યું
✍️ હસમુખ પટેલ
રાજ્ય કક્ષાના સંગઠનના આહ્વાનને અનુસરીને શિનોર તાલુકા ફેર પ્રાઈઝ શોપ એસોસિએશન દ્વારા તારીખ 1 નવેમ્બરથી પરમિટ ન લેવાની અને દુકાનો બંધ રાખવાની જાહેરાત કરવામાં આવી હતી. તે મુજબ આજે ત્રીજા દિવસે પણ તાલુકાની તમામ 31 સસ્તા અનાજની દુકાનો બંધ રહી હતી.
ગુજરાત ફેર પ્રાઈઝ શોપ એસોસિએશન દ્વારા પોતાની પડતર માંગણીઓને લઈને સમગ્ર રાજ્યમાં સરકાર માન્ય સસ્તા અનાજની દુકાનો બંધ રાખી હડતાલ શરૂ કરવામાં આવી છે. શિનોર તાલુકાના 41 ગામોમાં આવેલી 31 દુકાનોના દુકાનદારો એ આંદોલનને સંપૂર્ણ ટેકો જાહેર કર્યો છે.
શિનોર મામલતદાર કચેરીમાં પુરવઠા વહીવટી અધિકારીએ જણાવ્યું હતું કે હજુ સુધી કોઈ દુકાનદારે પરમિટ લીધેલ નથી, જેના કારણે રાશનનું વિતરણ થઈ શક્યું નથી.
હાલમાં કમોસમી વરસાદથી ખેડૂતોના પાકને થયેલ નુકસાનને પગલે સરકાર ચિંતામાં છે, ત્યારે ગરીબ વર્ગ માટે આશીર્વાદરૂપ સસ્તા અનાજની દુકાનો બંધ હોવાથી રેશનકાર્ડધારકોને આ મહિનાનું અનાજ મળી શક્યું નથી. રેશનકાર્ડ ધારકો એ રાજ્ય સરકારને વહેલી તકે હડતાલનો ઉકેલ લાવી સામાન્ય જનતાને રાહત આપવા માંગ કરી છે.
