માતુ શ્રી કાશીબા હરિભાઈ ગોટી ચૅરિટેબલ ટ્રસ્ટ દ્વારા સ્વ. દેવશીભાઈ લખમણભાઈ ભાટુ કૌશલ્ય ભવનનું આહવા ખાતે લોકાર્પણ 

માતુ શ્રી કાશીબા હરિભાઈ ગોટી ચૅરિટેબલ ટ્રસ્ટ દ્વારા સ્વ. દેવશીભાઈ લખમણભાઈ ભાટુ કૌશલ્ય ભવનનું આહવા ખાતે લોકાર્પણ 

રાષ્ટ્રનિર્માણ માટે છેવાડાનાં બાળકોને પણ સારી સુવિધાઓ સાથે શ્રેષ્ઠ શિક્ષણ મળે તે ખૂબ જરૂરી છે. – કેશુભાઈ ગોટી

માતુ શ્રી કાશીબા હરિભાઈ ગોટી ચૅરિટેબલ ટ્રસ્ટ દ્વારા ભારતભરમાં શિક્ષણધામનું નિર્માણ કરવામાં આવી રહ્યું છે. શિક્ષણ દ્વારા રાષ્ટ્રનિર્માણ અને ભારતીય સંસ્કૃતિનું સંરક્ષણ તેમજ સંવર્ધન થાય તે માટે દેશના અંતરિયાળ, પહાડી, દુર્ગમ વિસ્તારોમાં શાળાભવનો અને છાત્રાલયોનું નિર્માણ કરવામાં આવે છે. ટ્રસ્ટના પ્રમુખ શ્રી કેશુભાઈ ગોટીએ સહયોગી દાતાશ્રીઓના 50% આર્થિક સહયોગથી ભારતભરમાં 351 સરસ્વતીધામ નિર્માણ કરવાનો શુભ સંકલ્પ કર્યો છે, તે પૈકી 243મા સરસ્વતીધામ – સ્વ. દેવશીભાઈ લખમણભાઈ ભાટુ કૌશલ્ય ભવનનું આહવા ખાતે લોકાર્પણ કરવામાં આવ્યું. શ્રી સુરેશ (ભૈયાજી) જોશી, શ્રી કનુભાઈ દેસાઈ (નાણામંત્રી શ્રી, ગુજરાત રાજ્ય), શ્રી નટુભાઈ ભાટુ, શ્રીમતી જયશ્રીબહેન ભાટુ તેમજ મોંઘેરા મહેમાનોના વરદ હસ્તે ભવનનું લોકાર્પણ કરવામાં આવ્યું. સમારોહનો શુભારંભ મહેમાનોના વરદ હસ્તે દીપ પ્રાગટ્ય કરીને કરવામાં આવ્યો. બાલિકાઓએ સ્વાગત નૃત્ય કરી સૌને હૃદયના ભાવથી આવકાર્યા.

ડૉ. આંબેડકર વનવાસી કલ્યાણ ટ્રસ્ટના અધ્યક્ષ શ્રી તુલસીભાઈ માવાણીએ સૌનું શબ્દપુષ્પથી સ્વાગત કર્યું અને સંસ્થાનો પરિચય આપ્યો. સમારોહના અધ્યક્ષ શ્રી સુરેશ (ભૈયાજી) જોશી (પૂર્વ સરકાર્યવાહક, રાષ્ટ્રીય સેવક સંઘ), પૂજ્ય પી. પી. સ્વામીશ્રી, ટ્રસ્ટના માર્ગદર્શક શ્રી સવજીભાઈ ધોળકિયા (પદ્મશ્રી પુરસ્કૃત), તેમજ સરસ્વતીધામના સહયોગી દાતા શ્રી નટુભાઈ ભાટુ પરિવારનું આ અવસરે ભાવપૂર્વક અભિવાદન કરવામાં આવ્યું હતું. ભાટુ પરિવારે પ્રેમાગ્રહપૂર્વક શ્રી કેશુભાઈ ગોટીનું સ્મૃતિભેટ અર્પણ કરીને સન્માન કર્યું હતું. આ પ્રસંગે શ્રી કેશુભાઈ ગોટીએ જણાવ્યું હતું કે, “રાષ્ટ્રનિર્માણ માટે છેવાડાનાં બાળકોને પણ સારી સુવિધાઓ સાથે શ્રેષ્ઠ શિક્ષણ મળે તે ખૂબ જરૂરી છે. 351 સરસ્વતીધામ નિર્માણ યજ્ઞમાં કર્મયોગી પરિવાર તેમજ તમામ સમાજના લોકોનો ખૂબ સાથ-સહકાર મળી રહ્યો છે. ટ્રસ્ટ દ્વારા સરસ્વતીધામનું નિર્માણ, વૈચારિક ક્રાંતિ અભિયાન, કુપોષણ મુક્તિ અભિયાન અને શિક્ષા સાથી અભિયાન એમ ચાર વિભાગોમાં ભારતભરના અઢાર રાજ્યોમાં કાર્ય થઈ રહ્યું છે.” આ અવસરે શ્રી સવજીભાઈ ધોળકિયા (પદ્મશ્રી પુરસ્કૃત), શ્રી કનુભાઈ દેસાઈ, શ્રી સુરેશ (ભૈયાજી) જોશી વગેરેએ પ્રાસંગિક વક્તવ્ય આપીને જણાવ્યું હતું કે, માતુ શ્રી કાશીબા ટ્રસ્ટ દ્વારા શિક્ષણ ક્ષેત્રે ભગીરથ કાર્ય થઈ રહ્યું છે. આ સત્કાર્યમાં સહયોગ આપનાર સૌ અભિનંદનના અધિકારી છે.

માતુ શ્રી કાશીબા ટ્રસ્ટમાં કર્મયોગી તરીકે નિ:સ્વાર્થ ભાવે સેવા આપનાર સૌ કર્મયોગીઓનું તેમજ ડૉ. આંબેડકર વનવાસી કલ્યાણ ટ્રસ્ટમાં સેવા આપનાર બહેનોનું અભિવાદન કરવામાં આવ્યું હતું. આ અવસરે ધારાસભ્ય શ્રી વિજયભાઈ પટેલ, શ્રી મનહરભાઈ સાસપરા, શ્રી નટુભાઈ ભાટુના સ્નેહીજનો, વિવિધ સામાજિક તેમજ શૈક્ષણિક સંસ્થાઓના અગ્રણીઓ અને કાર્યકર્તાઓ ખૂબ મોટી સંખ્યામાં ઉપસ્થિત રહ્યા હતા.