અદાણી ફાઉન્ડેશનના “પ્રોજેક્ટ ફોર્ચ્યુન સુપોષણ” હેઠળ ઉમરપાડા તાલુકામાં વિશ્વ સ્તનપાન સપ્તાહ 2025 ઉજવાયો
અદાણી ફાઉન્ડેશનના “પ્રોજેક્ટ ફોર્ચ્યુન સુપોષણ” હેઠળ ઉમરપાડા તાલુકામાં વિશ્વ સ્તનપાન સપ્તાહ 2025 ઉજવાયો
ઓગસ્ટના પ્રથમ સપ્તાહમાં તારીખ ૧ થી ૭ ઓગષ્ટ દરમિયાન અદાણી ફાઉન્ડેશન સુરત જિલ્લાના ઉમરપાડા તાલુકામાં “પ્રોજેક્ટ ફોર્ચ્યુન સુપોષણ” હેઠળ વિશ્વ સ્તનપાન સપ્તાહ-2025ની ઉજવણી સરકારના આઈસીડીએસ વિભાગ સાથે મળીને ઉમરપાડા તાલુકાના ૬૮ ગામોમાં ઉત્સાહભેર કરવામાં આવી છે.
ઉજવણી દરમિયાન આંગણવાડી કર્મચારીઓ, આશા કાર્યકરો અને સુપોષણ સંગિનીઓની સહભાગિતાથી ગામ સ્તરે માતાઓ માટે જાગૃતતા અભિયાન ચલાવવામાં આવ્યું હતું. બાળકને પ્રથમ છ માસ સુધી માત્ર સ્તનપાનના મહત્વ વિશે માહિતગાર કરવા માટે રેલી, પોષણ પ્રવચન, આરોગ્ય ચર્ચા, પરિવાર કાઉન્સેલિંગ, અને હેલ્ધી બેબી સ્પર્ધા જેવી પ્રવૃતિઓ યોજાઈ હતી જેમાં ગ્રામીણ આદિવાસી માતાઓ સામેલ થઈ હતી.
સુપોષણ સંગિનીબહેનો દ્વારા માતાઓને સ્તનપાનના ફાયદા તથા પૂરક આહાર વિશે પૂરતી સમજ આપી અને માતા-શિશુના સ્વાસ્થ્ય માટે સમર્પિત દૃષ્ટિકોણ વિકસાવવા માટે પ્રેરણા આપવામાં આવી. આ ઉજવણીનો મુખ્ય હેતુ સ્તનપાન વિશે ગ્રામ્ય વિસ્તારમાં જાગૃતિ લાવવી અને “સ્તનપાન – જીવનદાયી પ્રથમ પોષણ” સંદેશને દરેક માતા સુધી પહોંચાડવાનો રહ્યો છે.
અદાણી ફાઉન્ડેશન આવા સામાજિક-આરોગ્યલક્ષી ઉપક્રમ થકી ઉમરપાડા તાલુકાના પછાત વિસ્તારોમાં માતા અને બાળકના પોષણ અને સુખાકારી માટે મહત્વપૂર્ણ યોગદાન આપી રહેલું છે.
