ઉત્તર બુનિયાદી વિદ્યાલય – રાણત, જિ. સુરતમાં ‘સાચી જોડણી લાગે વહાલી’ પરિસંવાદ યોજાયો

ઉત્તર બુનિયાદી વિદ્યાલય – રાણત, જિ. સુરતમાં ‘સાચી જોડણી લાગે વહાલી’ પરિસંવાદ યોજાયો

જોડણીના નિયમો ગોખવાના નથી, વિવિધ ઉદાહરણો દ્વારા નિયમો સમજવાના છે; જેથી જ્યારે જ્યારે વાચન કરીએ ત્યારે નિયમ યાદ આવે તેવું થવું જોઈએ. – રાજેશ ધામેલિયા

વિદ્યાર્થીઓ માતૃભાષા ગુજરાતીમાં સજ્જતા કેળવી શકે તે માટે જરૂરી માર્ગદર્શન મળી રહે તેવા ભાવ સાથે હળપતિ સેવા સંઘ – બારડોલી સંચાલિત ઉત્તર બુનિયાદી વિદ્યાલય, રાણત, તા. મહુવા, જિ. સુરત ‘સાચી જોડણી લાગે વહાલી’ પરિસંવાદનું આયોજન કરવામાં આવ્યું હતું. આ સેમિનાર યોજવા માટે ટ્રસ્ટના પ્રમુખ શ્રી પ્રકાશભાઈ દેસાઈ અને મંત્રી શ્રી મનોજભાઈ દેસાઈનો સહયોગ સાંપડ્યો હતો. આ પ્રસંગે શાળાના આચાર્યશ્રી મુકેશભાઈ પી. મૈસુરિયાએ માર્ગદર્શક શ્રી રાજેશકુમાર ધામેલિયાનો પરિચય આપ્યો અને શબ્દપુષ્પથી સ્વાગત કર્યું હતું.

આ પરિસંવાદમાં શ્રી રાજેશકુમાર ધામેલિયાએ વિદ્યાર્થીઓને જોડણીના નિયમો વાર્તા, વિવિધ ઉદાહરણો દ્વારા સરળ અને રસાળશૈલીમાં શીખવ્યા હતા. વિદ્યાર્થીઓને લખાવવામાં આવેલા શબ્દોને ચકાસવામાં આવ્યા. સમાન જણાતાં શબ્દોની જોડણીમાં અલગ અલગ નિયમો લાગુ પડે છે, તેને સરળતાથી કેવી રીતે યાદ રાખવું – સમજવું તે અંગે પ્રશ્નોત્તરી દ્વારા સ્પષ્ટ સમજ આપવામાં આવી હતી.

આ અવસરે શ્રી રાજેશકુમાર ધામેલિયા જણાવ્યું હતું કે, “માતૃભાષા પર પ્રભુત્વ મેળવવાથી દુનિયાની કોઈ પણ ભાષા સહેલાઈથી શીખી શકાય છે. શિક્ષણ એટલે માત્ર પરીક્ષામાં સારી ટકાવારી મેળવવી એટલું નહીં, વિદ્યાર્થીઓની વિચારશક્તિ ખીલવે તે શિક્ષણ. વિચારશક્તિ, તર્કશક્તિ, નિર્ણયશક્તિ, સમજશક્તિ વગેરે ખીલવવા માતૃભાષા ખૂબ મદદરૂપ થાય છે. ભાષાશિક્ષણ મેળવીએ ત્યારે એક વાત ખાસ ધ્યાનમાં રાખવાની જરૂર છે કે, જોડણીના નિયમો ગોખવાના નથી. વિવિધ ઉદાહરણો દ્વારા નિયમો સમજવાના છે, જેથી જ્યારે જ્યારે વાચન કરીએ ત્યારે નિયમ યાદ આવે તેવું થવું જોઈએ.”

પોતાનો કીમતી સમય ફાળવીને વિદ્યાર્થીઓને નિ:શુલ્ક માર્ગદર્શન આપવા બદલ શાળાના પરિવાર દ્વારા તજ્જ્ઞ શ્રી રાજેશકુમાર ધામેલિયાનો આભાર વ્યક્ત કર્યો હતો અને આગામી દિવસોમાં ફરીથી વિદ્યાર્થીઓને જ્ઞાનનો લાભ આપવા આમંત્રણ પાઠવ્યું હતું. આ પ્રસંગે શાળાના સૌ શિક્ષક મિત્રો, ગૃહપતિ શ્રી કરમસિંગભાઈ ડી. વસાવા, બી.એડ્.ના તાલીમાર્થીઓ અને ધોરણ : 9થી 12ના વિદ્યાર્થીઓ ઉપસ્થિત રહ્યાં હતાં.