એક વ્યક્તિની પ્રેરણાથી સેવાનું મહાયજ્ઞ : હરિયાળી અમાસે પ્રથમ વખત વિશાળ રક્તદાન શિબિર, 500થી વધુ યુનિટ રક્તસંગ્રહનું લક્ષ્ય
એક વ્યક્તિની પ્રેરણાથી સેવાનું મહાયજ્ઞ : હરિયાળી અમાસે પ્રથમ વખત વિશાળ રક્તદાન શિબિર, 500થી વધુ યુનિટ રક્તસંગ્રહનું લક્ષ્ય
સુરત : સમાજસેવા, માનવતા અને રક્તદાન પ્રત્યે અવિરત સમર્પણથી હજારો લોકોને રક્તદાન માટે પ્રેરિત કરનાર સમાજસેવક હરીશભાઈ ગુર્જરની સેવાયાત્રા હવે ગામડાં સુધી જનજાગૃતિનું પ્રેરણાસ્ત્રોત બની રહી છે. અત્યાર સુધી 45થી વધુ વિશાળ રક્તદાન શિબિરોનું સફળ આયોજન કરનાર તેમજ પોતે 60 વખત સ્વૈચ્છિક રક્તદાન કરી ચૂકેલા હરીશભાઈ ગુર્જરની સેવાભાવનાથી પ્રેરાઈને ભીલવાડા જિલ્લાના કેરેડા સ્થિત ગ્રામ જગદીશ ખાતે શ્રી જગદીશ ભગવાન સેવા સમિતિના ઉપક્રમે હરિયાળી અમાસના પાવન અવસરે, તા. 12 ઓગસ્ટ, 2026 બુધવાર ના રોજ પ્રથમ વખત વિશાળ સ્વૈચ્છિક રક્તદાન શિબિરનું આયોજન કરવામાં આવ્યું છે.
સમિતિના સક્રિય કાર્યકર કૈલાશદાસ વૈષ્ણવે જણાવ્યું હતું કે ગામ તેમજ આસપાસના અંદાજે 20થી 25 કિલોમીટર વિસ્તાર માટે આ પ્રકારની પ્રથમ અને ઐતિહાસિક રક્તદાન શિબિર બનશે. તેમણે જણાવ્યું કે હરીશભાઈ ગુર્જરના નિઃસ્વાર્થ સેવાકાર્ય, રક્તદાન અંગેની જનજાગૃતિ અને માનવજીવન બચાવવાના સતત અભિયાનથી પ્રેરાઈ સમિતિએ આ મહત્ત્વાકાંક્ષી આયોજનનો સંકલ્પ કર્યો છે.
તેમણે વિશ્વાસ વ્યક્ત કર્યો હતો કે ભગવાન જગદીશજીના આશીર્વાદ તથા વિસ્તારના નાગરિકોના ઉત્સાહભર્યા સહયોગથી શિબિરમાં 500થી વધુ યુનિટ રક્ત એકત્રિત થશે, જે અનેક જરૂરિયાતમંદ દર્દીઓ માટે જીવનદાયી સાબિત થશે.
શ્રી જગદીશ ભગવાન સેવા સમિતિએ વિસ્તારના યુવાનો, વિવિધ સામાજિક સંસ્થાઓ, મહિલા શક્તિ તથા તમામ નાગરિકોને મોટી સંખ્યામાં રક્તદાન કરીને આ મહાસેવા યજ્ઞને સફળ બનાવવા અપીલ કરી છે.
સમાજસેવક હરીશભાઈ ગુર્જરનું સેવાભર્યું જીવન એ વાતનો જીવંત પુરાવો છે કે એક વ્યક્તિનો નિઃસ્વાર્થ સંકલ્પ સમગ્ર સમાજમાં જનસેવાનું પ્રેરણાદાયી આંદોલન સર્જી શકે છે. બીજી તરફ કૈલાશદાસ વૈષ્ણવ તથા શ્રી જગદીશ ભગવાન સેવા સમિતિનો આ પ્રયાસ ગ્રામ્ય વિસ્તારમાં સામાજિક જાગૃતિ, માનવસેવા અને રક્તદાન પ્રત્યે નવી ચેતના પ્રસરાવતો પ્રેરણાદાયી ઉપક્રમ બની રહેશે.
