એકલ શ્રીહરિની 29મી વાર્ષિક સાધારણ સભાનું આયોજન થયું
સુરત : એકલ શ્રીહરિની 29મી વાર્ષિક સાધારણ સભાનું આયોજન રવિવારે સવારે સવા અગિયાર વાગ્યે કેનાલ રોડ સ્થિત શાંતમ હોલમાં કરવામાં આવ્યું હતું. સભાની શરૂઆતમાં સુરત ચેપ્ટરના પ્રમુખ રમેશ અગ્રવાલ (વિનાયક) એ સ્વાગત પ્રવચન આપીને સૌનું સ્વાગત કર્યું. સભામાં મુખ્ય અતિથિ રાજેશ પોદ્દાર દ્વારા એકલ શ્રીહરિની ડિરેક્ટરી અને સ્મરણિકાનું વિમોચન કરવામાં આવ્યું. તેમણે કહ્યું કે સંસ્કારો દ્વારા જ ભારતની સંસ્કૃતિને સુરક્ષિત અને મજબૂત બનાવી શકાય છે. તેમણે એકલ શ્રીહરિ દ્વારા કરવામાં આવી રહેલા સેવા, શિક્ષણ અને સંસ્કારના કાર્યોની પ્રશંસા કરતા સંસ્થાના કાર્યોને વધુ વિસ્તાર આપવાની જરૂરિયાત પર ભાર મૂક્યો.
સભામાં એકલ શ્રીહરિની મુખ્ય સમિતિ, મહિલા સમિતિ, યુવા સમિતિ અને શક્તિ વિંગ દ્વારા પીપીટીના માધ્યમથી વર્ષ દરમિયાનની પ્રવૃત્તિઓ, સિદ્ધિઓ અને સેવા કાર્યોનું વિસ્તૃત પ્રેઝન્ટેશન રજૂ કરવામાં આવ્યું તેમજ ચાલુ વર્ષના પ્રસ્તાવિત કાર્યક્રમો અને લક્ષ્યોની માહિતી આપવામાં આવી.
સભામાં ચારેય સમિતિઓની નવી કારોબારીની જાહેરાત કરવામાં આવી તથા નવનિયુક્ત પદાધિકારીઓ અને સભ્યોને સંસ્થાના કાર્યોને સમર્પણ, નિષ્ઠા અને સેવાભાવ સાથે આગળ વધારવાના સંકલ્પ લેવડાવવામાં આવ્યા. સભાનું સમાપન એકલ શ્રીહરિના રાષ્ટ્રીય ઉપપ્રમુખ વિશ્વનાથ સિંઘાનિયા દ્વારા સૌનો આભાર વ્યક્ત કરીને કરવામાં આવ્યું. આ પ્રસંગે એકલ શ્રીહરિની ચારેય સમિતિઓના સભ્યો ઉપરાંત અનેક મહાનુભાવો ઉપસ્થિત રહ્યા હતા.
