“ડાંગ અને નવસારીની શાળામાં ‘વૈચારિક ક્રાંતિ’ સેમિનાર યોજાયા
વિદ્યાર્થીઓમાં જીવનમૂલ્યો અને સફળતા સૂત્રોની પ્રેરણા”
પરીક્ષામાં જ્વલંત સિદ્ધિ મેળવવા માટે અદમ્ય ઉત્સાહ, દૃઢ મનોબળ, આયોજનપૂર્વક નિયમિત અભ્યાસ વગેરે જરૂરી છે. – રાજેશ ધામેલિયા
માતુ શ્રી કાશીબા હરિભાઈ ગોટી ચૅરિટેબલ ટ્રસ્ટ દ્વારા ભારતનાં સત્તર રાજ્યો શાળાભવનોનું નિર્માણ કાર્ય થઈ રહ્યું છે. ટ્રસ્ટના પ્રમુખ શ્રી કેશુભાઈ ગોટીનો શુભ સંકલ્પ 351 ભવનોનાં નિર્માણનો છે, તે પૈકી 243 ભવનોનું નિર્માણ થઈ ગયું છે અને પચાસ જેટલાં ભવનોનું નિર્માણ કાર્ય શરૂ છે. આ ઉપરાંત ટ્રસ્ટ દ્વારા વૈચારિક ક્રાંતિ અભિયાન, કુપોષણ મુક્તિ અભિયાન અને શિક્ષા સાથી અભિયાન ક્ષેત્રે પણ અનેકવિધ કાર્યો થઈ રહ્યાં છે.
‘વૈચારિક ક્રાંતિ દ્વારા માનસ પરિવર્તન’ અભિયાન અંતર્ગત માધ્યમિક અને ઉ. મા. શાળા પિંપરી, જિ. ડાંગ અને માધ્યમિક ગ્રામ – શાળા પ્રતાપનગર, જિ. નવસારીમાં સેમિનારનું આયોજન કરવામાં આવ્યું હતું, જેમાં બાળકેળવણીકાર શ્રી રાજેશકુમાર ધામેલિયાએ વિદ્યાર્થીઓને જીવન ઘડતરનું ભાથું પીરસ્યું હતું. કાર્યક્રમનું સંકલન કર્મયોગી શ્રી લક્ષ્મણભાઈ મોરડિયાએ કર્યું હતું અને એમના સૌજન્યથી વિદ્યાર્થીઓને નાસ્તો કરાવવામાં આવ્યો હતો. શ્રી ભદ્રેશભાઈ સાવલિયાએ ફોટોગ્રાફીની સેવા આપી હતી.
આ પ્રસંગે શ્રી લક્ષ્મણભાઈ મોરડિયાએ વિદ્યાર્થીઓને વ્યસનમુક્ત જીવન જીવવા અને ખોટા રિવાજોથી દૂર રહેવાની પ્રેરણા આપી હતી. શ્રી રાજેશકુમાર ધામેલિયાએ જણાવ્યું હતું કે, “વિદ્યાર્થી અવસ્થા એ જીવનનો સુવર્ણ સમયગાળો છે, આ અવસ્થામાં સમયનો સદુપયોગ કરીએ અને સુટેવો કેળવીએ તો જીવન મઘમઘતું બની જાય. આજે સૌ જીવનમાં સફળ બનવા ઇચ્છે છે. સફળતા માટેનું પ્રથમ સોપાન છે : લક્ષ્ય નિર્ધાર. પરીક્ષામાં જ્વલંત સિદ્ધિ મેળવવા માટે અદમ્ય ઉત્સાહ, દૃઢ મનોબળ, આયોજનપૂર્વક નિયમિત અભ્યાસ વગેરે ગુણો જરૂરી છે. જીવનમાં આર્થિક સંપત્તિની જરૂર તો છે જ, પણ તેની કરતાં સમજણની વધારે જરૂર છે. જીવનમાં આત્મસાત્ કરવા જેવાં સૂત્રો : જીવનમાં સફળતા મેળવવા સખત પુરુષાર્થ કરવો અને ત્યાર પછી જે પરિણામ આવે તેનો સહર્ષ સ્વીકાર કરવો. વિશ્વની કોઈ પણ વ્યક્તિ દરેક વખતે સફળ ન થઈ શકે. સફળતા-નિષ્ફળતા, લાભ-હાનિ, સુખ-દુ:ખ વગેરે દ્વંદ્વનો સહજ સ્વીકાર કરવો જોઈએ. આપણું ધાર્યું થાય તો હરિકૃપા, આપણું ધાર્યું ન થાય તો હરિ ઇચ્છા.”
બંને શાળાઓના વિદ્યાર્થીઓ ખૂબ ઉત્સાહથી પરિસંવાદમાં સહભાગી થયા હતા. કાર્યક્રમને સફળ બનાવવા શાળાના કર્મચારીઓએ જહેમત ઉઠાવી હતી.
