આયુષ્યમાન આરોગ્ય મેળાના સર્વ રોગ નિદાન કેમ્પમાં 225 જેટલા દર્દીઓએ લાભ લીધો
શિનોર તાલુકાના મોટા ફોફળિયા ખાતે આવેલ સી. એ. પટેલ હોસ્પિટલ અને સામુહિક આરોગ્ય કેન્દ્રમાં યોજાયેલ આયુષ્યમાન આરોગ્ય મેળાના સર્વ રોગ નિદાન કેમ્પમાં 225 જેટલા દર્દીઓએ લાભ લીધો .
શિનોર તાલુકાના મોટા ફોફળિયા ખાતે રાજ્યના આરોગ્ય અને પરિવાર કલ્યાણ વિભાગના સુભગ સમન્વયથી લોક ભાગીદારીથી શક્તિ કૃપા ચેરીટેબલ ટ્રસ્ટ સંચાલિત શ્રી છોટુભાઈ એ. પટેલ સામુહિક આરોગ્ય કેન્દ્રમાં વિભાગીય નાયબ નિયામક આરોગ્ય તબીબી સેવાઓ વડોદરા અને મુખ્ય જિલ્લા આરોગ્ય અધિકારી જિલ્લા પંચાયત વડોદરા ના માર્ગદર્શન હેઠળ તારીખ 17/07/ 2025 ના રોજ યોજાયેલ આયુષ્યમાન ભવ અભિયાન અંતર્ગત આયુષ્યમાન આરોગ્ય મેળો સર્વ રોગ નિદાન કેમ્પમાં 225 જેટલા દર્દીઓએ લાભ લીધો હતો. સર્વ રોગ નિદાન કેમ્પનો શુભારંભ ટ્રસ્ટી જીતેન્દ્રભાઈ પટેલે લાભાર્થી દર્દીઓની, અને સ્ટાફની ઉપસ્થિતિમાં દીપ પ્રાગટ્ય કરી કરવામાં આવ્યો હતો . કેમ્પમાં કુલ 225 જેટલા દર્દીઓ નોંધાયા હતા અને તેમાંથી આર.સી.એચ સેવાઓ અંતર્ગત 70 દર્દીઓ , લેબોરેટરી માં 210 દર્દીઓના પરીક્ષણ કરવામાં આવ્યા, 3 મેજર-માઈનોર સર્જરી હોસ્પિટલમાં કરવામાં આવી હતી. જ્યારે 4 દર્દીઓને વધુ સારવાર માટે ફરી બોલાવવામાં આવેલ છે. આ કેમ્પમાં મોટા ફોફળિયા સામુહિક આરોગ્ય કેન્દ્રના અધિક્ષક ડો . નિરવ પટેલ ની રાહબરી હેઠળ સ્થાનિક તબીબો ઉપરાંત પારુલ મેડિકલ કોલેજના નિષ્ણાત તબીબોએ ઉમદા સેવાઓ આપી હતી. કેમ્પને સફળ બનાવવા માટે મોટા ફોફળિયા સામુહિક આરોગ્ય કેન્દ્રના કાર્યકરોએ ભારે જહેમત ઉઠાવી હતી.
