મહાનુભવોને હસ્તે સરકારની વિવિધ કલ્યાણકારી યોજનાઓના લાભોનું વિતરણ કરાયું
સુરત:સોમવાર: કેન્દ્ર સરકાર અને રાજય સરકારની કલ્યાણકારી યોજનાઓનો લાભ છેવાડાના ગ્રામજનો સુધી પહોચે તેવા આશયથી સુરત જિલ્લાના પલસાણા તાલુકાની કરાળાગામ ખાતે પીઆઇબીના એડિશનલ ડાયરેક્ટર જનરલ શ્રીમતી સમીમા સિદીકીની અધ્યક્ષતામાં ‘વિકસિત ભારત સંકલ્પ યાત્રા’ યોજાઇ હતી.આ અવસરે જિલ્લા પંચાયત પ્રમુખશ્રી ભાવિનીબેન પટેલની પ્રેરક ઉપસ્થિતિ રહી હતી.
વિકસિત ભારત સંકલ્પ યાત્રા રથનું ભવ્ય સ્વાગત કરી વિકસિત ભારતની પ્રતિજ્ઞા લેવામાં આવી હતી.પ્રદર્શનના માધ્યમથી સરકારની વિવિધ યોજનાઓની નાગરિકોને જણકારી આપવામાં આવી હતી. નવા લાભાર્થીઓની નોંધણી પણ કરવામાં આવી હતી.
આ અવસરે પીઆઇબીના એડિશનલ ડાયરેક્ટર જનરલ શ્રીમતી સમીમા સિદિક્કીએ વિકસિત ભારત સંકલ્પ યાત્રા કાર્યક્રમમાં પ્રાસંગિક ઉદબોધન કરતા જણાવ્યું હતું કે, ભારતને વર્ષ ૨૦૪૭ સુધીમાં આત્મ નિર્ભર અને વિકસિત રાષ્ટ્ર બનવવાના સપનાને સાકાર કરવા માટે સરકાર કટિબદ્ધ છે. છેવાડાના ગરીબ, મધ્યમ વર્ગના લોકોના હિત માટે સરકાર હરહંમેશા પ્રયત્નશીલ રહી છે. સરકારની યોજનાઓ આપણા માટે જ છે જેનો દરેક લોકોએ લાભ લેવો જોઇએ, તમામ લોકોને આ સંકલ્પ રથ વિશે માહિતી આપી સરકારની વિવિધ યોજનાનો લાભ અન્ય લોકોને અપાવવો જોઇએ એમ કહી વિકસિત ભારત સંકલ્પ યાત્રામાં જોડાઇને લાભ લેવા માટે અપીલ કરી હતી
વધુમાં તેમણે વિકસિત ભારત સંકલ્પ યાત્રામાં મોટી સંખ્યામાં ઉપસ્થિત ગ્રામજનોને આઇસીડીએસ વિભાગ પાસે પોષણયુક્ત આહારના મહત્વ વિશે, આરોગ્ય વિભાગ પાસે આરોગ્યલક્ષી વિવિધ યોજનાઓ વિશે અને કૃષિ વિભાગ પાસે કૃષિને લગતી તમામ યોજનાઓ વિશે માર્ગદર્શન મેળવવા માટે અનુરોધ કર્યો હતો.
આ વેળાએ મહાનુભવોના હસ્તે વિવિધ યોજનાઓના લાભાર્થીઓને સહાયનું વિતરણ કરવામાં આવ્યું હતું. વડાપ્રધાન નરેન્દ્રભાઈ મોદીની વર્ચ્યુઅલ ઉપસ્થિતિમાં આયોજિત કાર્યક્રમનું જીવંત પ્રસારણ ઉપસ્થિત સૌએ નિહાળ્યું હતું.
આ પ્રસંગે પલસાણા તાલુકાના પ્રમુખશ્રી યોગેશભાઇ પટેલ, સંગઠન પ્રમુખશ્રી ભરતભાઇ રાઠોડ, જિલ્લા પંચાયત સભ્ય સર્વશ્રી કાજલબેન ચૌધરી, રમેશભાઇ રાઠોડ, સંગઠન મહામંત્રીશ્રી જીગરભાઇ નાયક, અગ્રણી અશોકભાઇ રાઠોડ, કામરેજ પ્રાંત અઘિકારીશ્રી,નાયબ ડી.ડી.ઓશ્રી, તાલુકા વિકાસ અધિકારીશ્રી, સરપંચશ્રીમતી ભારતીબેન વશી સહિત મોટી સંખ્યામાં ગ્રામજનો અને શાળાના વિદ્યાર્થીઓ ઉપસ્થિત રહ્યા હતા
