વિશ્વના ધનિકોમાં ગૌતમ અદાણીની ગગનચુંબી છલાંગ:
$100 અબજની ક્લબમાં ધમાકેદાર વાપસી, બિલ ગેટ્સને પછાડી 17માં સ્થાને
ભારતીય ઉદ્યોગ જગતના માંધાતા અને અદાણી ગ્રુપના ચેરમેન ગૌતમ અદાણીએ ફરી એકવાર વૈશ્વિક સ્તરે ડંકો વગાડ્યો છે. શેરબજારના ઘટાડા વચ્ચે પણ અદાણીની સંપત્તિમાં તોફાની તેજી જોવા મળી છે. માત્ર 24 કલાકમાં $7.16 અબજ (આશરે ₹60,000 કરોડ) ની કમાણી કરીને અદાણીએ વિશ્વના અમીરોની યાદીમાં મોટું ઉલટફેર કરી નાખ્યું છે.
આ સાથે જ ધનિકોની વૈશ્વિક યાદીમાં નવો ઈતિહાસ રચાયો છે. બ્લૂમબર્ગ બિલિયોનેર ઈન્ડેક્સના લેટેસ્ટ રિપોર્ટ અનુસાર, અદાણીની નેટવર્થ હવે $106 અબજ પર પહોંચી ગઈ છે. આ સાથે જ તેઓ વિશ્વના સૌથી ધનિકોની યાદીમાં 17માં સ્થાને પહોંચ્યા છે. તેમણે માઈક્રોસોફ્ટના દિગ્ગજ બિલ ગેટ્સ ($104 અબજ) ને પાછળ છોડી દીધા છે. આ વર્ષે અત્યાર સુધીમાં તેમની સંપત્તિમાં $21.4 અબજનો જંગી વધારો થયો છે.
આ તરફ અદાણી અને અંબાણી જૂથની સંપત્તિની રેસમાં પણ અંતર વધ્યું છે. એક તરફ ગૌતમ અદાણીની સંપત્તિમાં જંગી ઉછાળો આવ્યો છે, તો બીજી તરફ રિલાયન્સના મુકેશ અંબાણીની નેટવર્થમાં ઘટાડો નોંધાયો છે. મુકેશ અંબાણીની સંપત્તિ $1.11 અબજ ઘટીને હવે $90.2 અબજ થઈ છે, જેના કારણે તેઓ વિશ્વના અમીરોની યાદીમાં 20માં સ્થાને ખસી ગયા છે. અદાણી હવે અંબાણી કરતા આશરે $16 અબજ વધુ સંપત્તિ ધરાવે છે.
બજારના નિષ્ણાતોના મતે, અદાણીના શેરોમાં આવેલી તેજી પાછળના મુખ્ય કારણોમાંઅદાણી ગ્રુપની કંપનીઓના મજબૂત ત્રિમાસિક પરિણામો અને રોકાણકારોનો વધતો ભરોસો છે. ખાસ કરીને પાવર અને ઈન્ફ્રાસ્ટ્રક્ચર સેક્ટરમાં ગ્રુપના આક્રમક વિસ્તારે તેમની નેટવર્થને નવી ઊંચાઈ આપી છે.
વિશ્વના ટોપ-5 અમીરોની યાદી જોઈએ તો,
1. એલોન મસ્ક: $645 અબજ (ટેસ્લા/સ્પેસએક્સ)
2. લેરી પેજ: $289 અબજ (ગૂગલ)
3. જેફ બેઝોસ: $274 અબજ (એમેઝોન)
4. સર્ગેઈ બ્રિન: $269 અબજ (ગૂગલ)
5. માર્ક ઝકરબર્ગ: $233 અબજ (મેટા)
ગૌતમ અદાણીની આ સફળતા માત્ર એક વ્યક્તિગત સિદ્ધિ નથી, પરંતુ ભારતીય અર્થતંત્રના વધતા પ્રભાવનું પ્રતિક છે. જે રીતે તેમણે બિલ ગેટ્સ જેવા વૈશ્વિક દિગ્ગજોને પાછળ છોડ્યા છે, તે જોતા આગામી સમયમાં તેઓ ટોપ-10માં ફરી સ્થાન મેળવે તેવી પૂરી શક્યતા છે.
