ગુજરાત
ઉમરપાડામાં અદાણી ફાઉન્ડેશન અને ICDSના સંયુક્ત ઉપક્રમે રાષ્ટ્રીય પોષણ માહની ઉજવણી
- ઉમરપાડામાં અદાણી ફાઉન્ડેશન અને ICDSના સંયુક્ત ઉપક્રમે રાષ્ટ્રીય પોષણ માહની ઉજવણી
- ઉમરપાડા જી. સુરત તા.૧૦ : કુપોષણમુક્ત અને સુપોષિત સમાજના નિર્માણ માટે સપ્ટેમ્બર માસ દરમિયાન ઉમરપાડા તાલુકામાં ‘રાષ્ટ્રીય પોષણ માહ’ની ઉત્સાહભેર ઉજવણી કરવામાં આવી હતી. અદાણી ફાઉન્ડેશનના ‘ફોર્ચ્યુન સુપોષણ’ પ્રોજેક્ટ અને જિલ્લા પંચાયતના ICDS વિભાગના સંયુક્ત ઉપક્રમે યોજાયેલા આ અભિયાનમાં ગ્રામીણ સમુદાયની સક્રિય ભાગીદારી જોવા મળી હતી.
- ઉમરપાડા તાલુકામાં એપ્રિલ ૨૦૨૪થી ‘ફોર્ચ્યુન સુપોષણ’ પ્રોજેક્ટ શરૂ કરવામાં આવ્યું છે. આ પ્રોજેક્ટ અંતર્ગત ICDS વિભાગના સહયોગથી કુપોષણનું પ્રમાણ ઘટાડવા તેમજ બાળકો, કિશોરીઓ, સગર્ભા મહિલાઓ, ધાત્રી માતાઓ અને તેમના પરિવારોમાં પોષણ અંગે જાગૃતિ વધારવા માટે સતત પ્રયત્નો કરવામાં આવી રહ્યા છે. રાષ્ટ્રીય પોષણ માહ દરમિયાન તાલુકાના વિવિધ ગામોમાં જાગૃતિ રેલી, પરિવાર પરામર્શ, જૂથ ચર્ચા, પોષણ પ્રતિજ્ઞા, ‘મારી આંગણવાડી, મારી જવાબદારી’ અભિયાન, પૌષ્ટિક વાનગીઓનું પ્રદર્શન, પોષણ વાટિકાને પ્રોત્સાહન તેમજ શાળા, આંગણવાડી કેન્દ્રો અને લાભાર્થીઓના ઘરે વિવિધ જાગૃતિ કાર્યક્રમો યોજવામાં આવ્યા હતા. આ સાથે સ્થાનિક શાકભાજી, સંતુલિત આહાર, માતા-બાળકના પોષણ અને સ્વચ્છતાના મહત્વ અંગે ઘરે-ઘરે જઈને લોકોને માહિતગાર કરાયા હતા.
- આ સમગ્ર ઝુંબેશ દરમિયાન અદાણી ફાઉન્ડેશનની ટીમ અને ગ્રામ્ય સ્તરે સક્રિય ‘સુપોષણ સંગિની’ બહેનોએ ICDS સાથે મળીને તાલુકાના અંદાજે ૨૮,૯૭૭ લોકોને પોષણ અંગે વિગતવાર માર્ગદર્શન પૂરું પાડ્યું હતું. અદાણી ફાઉન્ડેશન અને ICDSના આ સઘન પ્રયાસોનો મુખ્ય આશય પોષણને જનઆંદોલન બનાવી ઉમરપાડાને કુપોષણમુક્ત કરવાનો છે. સ્થાનિક નાગરિકો, આંગણવાડી કાર્યકરો અને સરકારી વિભાગોના સંગઠિત પ્રયાસોથી ઉમરપાડા તાલુકો એક સ્વસ્થ અને સુપોષિત ભવિષ્ય તરફ મક્કમતાથી આગળ વધી રહ્યો છે.
