- ઘારી વગર ચંદી પડવો અધૂરો! સુરતમાં મીઠાઈના વેપારીઓએ શરૂ કરી ધમધમતી તૈયારીઓ
ચંદી પડવા પહેલાં સુરતમાં ઘારી બનાવવાની તૈયારીઓ તેજ, દેશ-વિદેશમાંથી મળવા લાગ્યા ઓર્ડર
ખાણીપીણી માટે વિશ્વભરમાં જાણીતા સુરત શહેરમાં સુરતીઓના મનપસંદ તહેવાર ચંદી પડવાને લઈને તૈયારીઓ શરૂ થઈ ગઈ છે. ચંદી પડવા સાથે ઘારી અને સુરતી ભૂસું ખાવાની પરંપરા જોડાયેલી હોવાથી શહેરમાં તહેવારનો માહોલ જોવા મળી રહ્યો છે. તહેવાર નજીક આવતાં જ ઘારીના વેપારીઓએ ઉત્પાદન વધારી દીધું છે અને ગ્રાહકોની માગને પહોંચી વળવા માટે ખાસ તૈયારીઓ હાથ ધરી છે. - ઘારીની મીઠાશમાં વસે છે સુરતની પરંપરા
ચંદી પડવાનો તહેવાર સુરતીઓ માટે માત્ર મીઠાઈ ખાવાનો પ્રસંગ નથી, પરંતુ પરિવાર અને મિત્રો સાથે મળીને ઉજવણી કરવાનો અવસર છે. આ દિવસે સુરતીઓ ઘારી અને સુરતી ભૂસું ખાઈને વર્ષો જૂની પરંપરા જાળવી રાખે છે. સુરતની બહાર રહેતા લોકો પણ આ તહેવાર નિમિત્તે ઘારીનો સ્વાદ માણવા આતુર રહે છે. - માવા, ડ્રાયફ્રૂટ્સ અને શુદ્ધ ઘીથી બને છે સ્વાદિષ્ટ ઘારી
સુરતી ઘારી તૈયાર કરવા માટે દૂધના માવા સાથે કાજુ, બદામ, પિસ્તા અને ખાસ મસાલાનું મિશ્રણ તૈયાર કરવામાં આવે છે. ત્યારબાદ મેંદાના લોટની મદદથી ઘારીને ગોળ આકાર આપવામાં આવે છે. ઘારીને તળ્યા બાદ તેના પર ઘીનો ઉપયોગ કરીને તેને સ્વાદિષ્ટ બનાવવામાં આવે છે. ઘારી બનાવવાની દરેક પ્રક્રિયામાં સ્વાદ અને ગુણવત્તાનું ખાસ ધ્યાન રાખવામાં આવે છે.
ઘારી તૈયાર કરવામાં સમય અને મહેનત બંને જરૂરી હોવાથી વેપારીઓ તહેવાર પહેલાંથી જ મોટા પ્રમાણમાં ઉત્પાદન શરૂ કરી દે છે. દુકાનોમાં ઘારી બનાવવાની કામગીરી તેજ બનતાં તહેવારની રોનક પણ વધવા લાગી છે. - વિદેશમાં વસતા સુરતીઓમાં પણ ઘારીનો ક્રેઝ
સુરતી ઘારીની લોકપ્રિયતા હવે માત્ર સુરત પૂરતી મર્યાદિત નથી. દેશનાં અન્ય શહેરો ઉપરાંત વિદેશમાં વસતા મૂળ સુરતીઓ પણ ચંદી પડવા નિમિત્તે ઘારી મંગાવે છે. તેમના માટે ઘારી માત્ર મીઠાઈ નહીં, પરંતુ વતનની યાદો અને સુરતની સંસ્કૃતિ સાથે જોડાયેલી લાગણી છે. આથી વેપારીઓને સ્થાનિક ગ્રાહકોની સાથે બહારગામ અને વિદેશમાં મોકલવા માટે પણ ઓર્ડર મળવા લાગે છે. - તાત્યા ટોપે સાથે પણ જોડાયેલી છે ઘારીની લોકવાયકા
સુરતી ઘારીના ઇતિહાસ સાથે એક લોકપ્રચલિત માન્યતા પણ જોડાયેલી છે. કહેવાય છે કે તાત્યા ટોપે યુદ્ધમાં વિજય મેળવ્યા બાદ સુરત આવ્યા ત્યારે તેમના સ્વાગત માટે ઘારી પીરસવામાં આવી હતી. આ લોકવાયકા આજે પણ સુરતની પરંપરા સાથે જોડાયેલી છે.
ચંદી પડવાના દિવસો નજીક આવતાં વેપારીઓ ઉત્પાદન, પેકિંગ અને ઓર્ડરની વ્યવસ્થામાં વ્યસ્ત બન્યા છે. હવે સુરતીઓ આતુરતાથી આ પરંપરાગત તહેવારની રાહ જોઈ રહ્યા છે, જેમાં ઘારી અને સુરતી ભૂસાંની મોજ સાથે સુરતની આગવી સંસ્કૃતિની ઝલક જોવા મળશે.
