સિંગાપોર-દુબઈની તર્જ પર ભારતમાં બનશે ‘એરપોર્ટ સિટીઝ’; અદાણી ગ્રુપ દ્વારા ભવ્ય પ્રોજેક્ટનું અનાવરણ
સિંગાપોર-દુબઈની તર્જ પર ભારતમાં બનશે ‘એરપોર્ટ સિટીઝ’; અદાણી ગ્રુપ દ્વારા ભવ્ય પ્રોજેક્ટનું અનાવરણ
મુંબઈ : ભારતના સૌથી મોટા ખાનગી એરપોર્ટ ઓપરેટર, અદાણી એરપોર્ટ હોલ્ડિંગ્સ લિ. (AAHL) ની પેટાકંપની અદાણી એરપોર્ટ સિટી લિ. (AACL) દ્વારા એક મહત્વાકાંક્ષી પ્રોજેક્ટની જાહેરાત કરવામાં આવી છે. કંપની ભારતના પાંચ રાજ્યોમાં ૬૫૫ એકરથી વધુ વિસ્તારમાં ફેલાયેલા સંકલિત ‘એરપોર્ટ સિટી ડેવલપમેન્ટ’નું નિર્માણ કરવા જઈ રહી છે. ₹૨૦,૦૦૦ કરોડથી વધુના આ વિશાળ રોકાણ સાથે પ્રથમ તબક્કામાં મુંબઈ, નવી મુંબઈ, અમદાવાદ, લખનૌ, જયપુર અને ગુવાહાટીમાં આશરે ૨૨ મિલિયન ચોરસ ફૂટ વિસ્તાર વિકસાવવામાં આવશે.
આ પ્રોજેક્ટ હેઠળ એરપોર્ટની આસપાસ આતિથ્ય (હોસ્પિટાલિટી), છૂટક વેપાર, મનોરંજન અને વાણિજ્યિક માળખાને એકસાથે લાવી આધુનિક શહેરી જિલ્લાઓ તૈયાર કરાશે. આ કુલ જમીનમાંથી લગભગ ૪૪૦ એકર જમીન એકલી મુંબઈ અને નવી મુંબઈમાં છે, જ્યાં કુલ રોકાણના ૭૦ ટકા હિસ્સો વાપરવામાં આવશે.
સિંગાપોરના ચાંગી અને દુબઈ જેવા વૈશ્વિક સ્તરના એરપોર્ટથી પ્રેરિત આ મોડેલ વિશે વાત કરતા ડિરેક્ટર શ્રી જીત અદાણીએ જણાવ્યું કે, આ પ્રોજેક્ટ આર્થિક પ્રવૃત્તિ, રોજગાર અને લાંબા ગાળાના મૂલ્યનું સર્જન કરશે. આ પહેલ અંતર્ગત કંપનીએ પાંચ લક્ઝરી હોટેલ્સ માટે ‘IHG હોટેલ્સ અને રિસોર્ટ્સ’ સાથે કરાર કર્યા છે, જેમાં ભારતમાં પ્રથમ વખત ‘કિમ્પ્ટન’ બ્રાન્ડની શરૂઆત થશે. પર્યાવરણની જાળવણી માટે આ પ્રોજેક્ટને યુ.એસ. ગ્રીન બિલ્ડીંગ કાઉન્સિલ દ્વારા ‘લીડ ગોલ્ડ પ્રી-સર્ટિફિકેશન’ પણ મળ્યું છે. પ્રોજેક્ટના આયોજન અને બાંધકામ માટે L&T, ટાટા પ્રોજેક્ટ્સ અને CBRE જેવી વૈશ્વિક અને સ્થાનિક અગ્રણી કંપનીઓ સહયોગ આપી રહી છે.
0000
