“શિનોરમાં મામલતદાર દ્વારા પકડાયેલ નંબરસરહીત ડમ્પર શંકાસ્પદ રીતે છોડાતા ચર્ચા”
શિનોર મામલતદાર દ્વારા સમાચારો ચમકતા તાજેતરમાં રેતી થી ઓવરલોડ ભરેલા ડમ્પરો તથા એક ટ્રેકટરને ઝડપી પાડી મામલતદાર કચેરીમાં મુકાવી દીધા, જેમાંથી નંબર વગરનું એક ડમ્પર બે દિવસ પછી છોડી દેતાં શંકા કુશંકા વ્યાપેલ છે.
તાજેતરમાં વર્તમાનપત્રોમાં ભારદારી ડમ્પરો ના કારણે માલસર અને અશા વચ્ચેના માધવસેતુ પુલ ની હાલત બગડી હોવા સાથે શિનોરથી માલસર નો રસ્તો તદ્દન ભંગાર થઈ ગયાના સમાચારો ચમક્યા હતા. અને સરકારી તંત્ર તથા ખાણ ખનીજ અને પોલીસ વિભાગ સામે માધવ સેતુ પુલ ઉપરથી રાત્રીના તથા દિવસના ઓવરલોડ ભરેલા ડમ્પરો કેમ ચાલવા દે છે, તે બાબતે હપ્તા લેવાતા હોવાની બુમ ઉઠી હતી. આ સમાચારો ચમકતાં કેસ બતાવવા માટે મામલતદાર કચેરી એક્શનમાં આવી હતી અને તારીખ 12 નવેમ્બરના રોજ રેતી ભરેલા બે પરમીટ વગર ના ડમ્પરો અને એક ટ્રેક્ટર ને ડીટેઇન કરાવીને મામલતદાર કચેરીમાં મૂકી દેવામાં આવ્યા હતા. આ પકડાયેલા ડમ્પરો ટાટા કંપનીના ભારત બેન્ઝ તથા ગાડી પર જય માતાજી લખેલા એક માલિકના માલુમ પડતા હતા. જેમાંથી એક ડમ્પર ની આગળ અને પાછળ રજીસ્ટ્રેશન નંબર નહોતો. જે સામેલ તસવીરમાં દેખાય છે અને અન્ય ડમ્પર નો નંબર GJ 16 AU 6157 હતો, અને એક ટ્રેક્ટર હતું. બે દિવસ પછી મામલતદાર કચેરીમાંથી નંબર વગરનું ડમ્પર છોડી દેવામાં આવ્યું હોવાની જાણ થતાં આજરોજ મામલતદાર શિનોરને વારંવાર ટેલીફોનિક પૂછપરછ માટે ફોન કરતાં
કોઈપણ ફોન ઉપાડતું નહોતું. જ્યારે નંબર વાળું ડમ્પર કચેરીમાં પડેલ હતું. ડમ્પરો તથા ટ્રેક્ટર રેતીથી કાયદેસર ભરેલા હોત તો તેઓની પાસે પરમીટ હાજર હોત, અને પરમીટ ના હોવાના કારણે જ મામલતદાર દ્વારા ડીટેઇન કરીને મુકાવ્યા હોય એ હકીકત છે.
નંબર વગરનું કોઈ પણ વાહન એ ગેર કાનૂની ગણી શકાય, અને પરમિટ વગર રેતી ભરીને જતું હોય તો તે વધુ ગુનો બને છે. મામલતદાર કચેરીમાંથી નંબર વગરનું ઓવરલોડ રેતી ભરેલું ડમ્પર છોડવામાં આવ્યું કે રાત્રિના સમયે કોઈ ઉઠાવી ગયું તે તપાસનો વિષય બનેલ છે. મામલતદાર કચેરીના સર્કલ ઓફિસર વિશાલભાઈ એ ફોન પર જણાવ્યું કે ડમ્પરો બાબતે ખાણ ખનીજ વિભાગને જાણ કરેલ છે.
