ખાવડા 4 સી પાવર ટ્રાન્સમિશન લિમિટેડ દ્વારા ‘પ્રોજેક્ટ કૌશલ’ હેઠળ તુંબી ગામમાં કોમ્યુનિટી લાઇબ્રેરીનું ઉદ્ઘાટન કરવામાં આવ્યું

ખાવડા 4 સી પાવર ટ્રાન્સમિશન લિમિટેડ દ્વારા ‘પ્રોજેક્ટ કૌશલ’ હેઠળ તુંબી ગામમાં કોમ્યુનિટી લાઇબ્રેરીનું ઉદ્ઘાટન કરવામાં આવ્યું
વલસાડ : શિક્ષણ પ્રગતિનો આધાર છે, છતાં ગ્રામ્ય વિસ્તારોના ઘણા વિદ્યાર્થીઓ માટે ગુણવત્તાયુક્ત અભ્યાસ સાધનો સુધી પહોંચ હજુ પણ પડકારરૂપ છે. આ ખાધને દૂર કરવા માટે, વલસાડ જીલ્લાના તુંબી ગામમાં ‘પ્રોજેક્ટ કૌશલ’ હેઠળ કોમ્યુનિટી લાઇબ્રેરીનું ઉદ્ઘાટન કરવામાં આવ્યું છે જે ગ્રામ્ય યુવાનોને સશક્ત બનાવવાની દિશામાં મહત્વપૂર્ણ પગલું છે. આ પહેલ ખાવડા 4 સી પાવર ટ્રાન્સમિશન લિમિટેડ દ્વારા બુક ફોર ચેન્જ ફાઉન્ડેશન સાથે સહયોગમાં, સમુદાય કલ્યાણ પહેલ તરીકે અમલમાં મૂકવામાં આવી છે.
ગામના યુવાનો માટે સમર્પિત આ લાઇબ્રેરીમાં 25 વિદ્યાર્થીઓ માટે બેસવાની સુવિધા છે, જે તેમને શાંતિપૂર્ણ, એકાગ્ર અને સહાયક વાતાવરણમાં અભ્યાસ કરવાની તક આપે છે. આ લાઇબ્રેરી પોલીસ, એસએસસી, ટીઈટી અને યુપીએસસી સહિત 23થી વધુ સ્પર્ધાત્મક પરીક્ષાઓ માટે તૈયારી કરતા વિદ્યાર્થીઓને ધ્યાનમાં રાખીને વિકસાવવામાં આવી છે. સુવ્યવસ્થિત પુસ્તકોના સંગ્રહ દ્વારા, મોંઘી અભ્યાસ સામગ્રી ખરીદી શકતા ન હોય એવા વિદ્યાર્થીઓને હવે પોતાના ગામમાં જ મફત અને ગુણવત્તાયુક્ત સંસાધનો ઉપલબ્ધ થયા છે.
આ પહેલ અંગે પોતાના વિચારો વ્યક્ત કરતાં કંદર્પ પાંડે, પ્રોજેક્ટ હેડ – વલસાડ અને નવસારી, ખાવડા 4 સી પાવર ટ્રાન્સમિશન લિમિટેડે જણાવ્યું હતું કે, “તુંબી જેવા ગામોમાં યુવાનોમાં અદ્ભુત ક્ષમતા અને સંકલ્પ છે, પરંતુ યોગ્ય સંસાધનોના અભાવે તેઓ ઘણીવાર પાછળ રહી જાય છે. ‘પ્રોજેક્ટ કૌશલ’ હેઠળ આ કોમ્યુનિટી લાઇબ્રેરી એ ખાધને પૂરી કરવાની અમારી કોશિશ છે. આ માત્ર એક ભૌતિક જગ્યા નથી, પરંતુ એક એવો પ્લેટફોર્મ છે જ્યાં વિદ્યાર્થીઓ શીખી શકે, વિકસી શકે અને ઉજ્જવળ ભવિષ્ય તરફ આગળ વધી શકે. યોગ્ય માર્ગદર્શન અને સહાય મળે તો આ યુવા પ્રતિભાઓ અદ્ભુત સફળતા હાંસલ કરી શકે છે અને સમાજમાં મહત્વપૂર્ણ યોગદાન આપી શકે છે.”
આ પહેલ પાછળ મજબૂત સામાજિક અને ભાવનાત્મક દ્રષ્ટિકોણ જોડાયેલો છે, જે ગ્રામ્ય ભારતની હકીકતને સ્પર્શે છે. જ્યાં પ્રતિભા તો ભરપૂર છે, પરંતુ તકો અને સુવિધાઓ મર્યાદિત છે. તુંબી ગામના ઘણા વિદ્યાર્થીઓ માટે આ લાઇબ્રેરી માત્ર એક ઇમારત નહીં, પરંતુ એવા સપનાઓ સુધી પહોંચવાનો માર્ગ છે, જે અત્યાર સુધી દૂર લાગતા હતા.
ડિજિટલ સમાવેશને ધ્યાનમાં રાખીને, લાઇબ્રેરીમાં કમ્પ્યુટર અને પ્રિન્ટરની સુવિધા પણ ઉપલબ્ધ છે. આથી વિદ્યાર્થીઓ કોઈ ટેક્નોલોજીકલ અડચણ વિનાઑનલાઇન ફોર્મ ભરી શકે, ડિજિટલ અભ્યાસ સામગ્રી મેળવી શકે અને આધુનિક શૈક્ષણિક પ્લેટફોર્મ્સ સાથે જોડાયેલા રહી શકે છે. સમાવેશિતા અને ગૌરવને પ્રાથમિકતા આપતા, છોકરીઓ અને છોકરાઓ માટે અલગ શૌચાલયોની વ્યવસ્થા કરવામાં આવી છે, જે સુરક્ષિત અને આરામદાયક વાતાવરણ પૂરું પાડે છે અને ખાસ કરીને યુવતીઓની ભાગીદારી વધારવામાં મદદરૂપ થાય છે.
તુંબી ગામની આ કોમ્યુનિટી લાઇબ્રેરી આશા, સમાવેશ અને પ્રગતિનું પ્રતિક બની રહી છે, જે ગામના યુવાનોને મોટા સપનાઓ જોવાની, ઊંચા લક્ષ્યો હાંસલ કરવાની અને શિક્ષણ દ્વારા ઉત્તમ ભવિષ્ય બનાવવા પ્રેરણા આપે છે.