સ્નેચર પાસેથી સસ્તામાં ખરીદી કરી ઊંચા ભાવે વેચાણ કરનાર 8 મોબાઈલ સાથે ઝડપાયો
સ્નેચર પાસેથી સસ્તામાં ખરીદી કરી ઊંચા ભાવે વેચાણ કરનાર 8 મોબાઈલ સાથે ઝડપાયો
સુરત શહેરમાં રાહદારીઓ પાસેથી મોબાઇલ સ્નેચિંગ અને ચોરી કરતા આરોપીઓ પાસેથી સસ્તા ભાવે મોબાઇલની ખરીદી કરી અન્યને વેંચી મારતા શખ્સની સુરતના ઉગત ભેસાણ રોડ ખાતેથી ક્રાઈમ બ્રાન્ચે ધરપકડ કરી ચોરીના કુલ આઠ જેટલા મોબાઈલ કબજે કર્યા છે. ક્રાઈમ બ્રાન્ચ દ્વારા આરોપીની કરવામાં આવેલી પૂછપરછમાં પુણા અને રાંદેર પોલીસ ચોપડે નોંધાયેલા મોબાઈલ ચોરીના બે ગુનાઓના ભેદ પણ મુકેલાઈ ગયા છે.આરોપી અગાઉ પણ અડાજણ પોલીસના હાથે મોબાઈલ ચોરીના ગુનામાં ઝડપાઇ ચુક્યો છે.જે આરોપીની ધરપકડ કરી આગળની કાર્યવાહી સુરત ક્રાઈમ બ્રાન્ચે હાથ ધરી છે.
પોલીસને બાતમી મળી હતી કે, રાહદારીઓ પાસેથી મોબાઇલની સ્નેચિંગ અને ચોરી કરતા આરોપીઓ પાસેથી સસ્તા ભાવે મોબાઇલની ખરીદી કરી અન્ય ને વેચી મારતો શખ્સ સુરતના ઉગત ભેસાણ રોડ ખાતે રહે છે. જે માહિતીના આધારે સુરત ક્રાઈમ બ્રાન્ચે વોચ ગોઠવી ઉગત ભેસાણ રોડ પરથી અભિષેક ઉર્ફે નાગો ઓમદાસ નિશાદને ઝડપી પાડ્યો હતો. જે શખ્સની અંગઝડતી લેતા અલગ અલગ કંપનીના આઠ જેટલા મોબાઈલ મળી આવ્યા હતા. જે મોબાઈલ અંગેના આધાર પુરાવા માંગતા આરોપી સંતોષકારક જવાબ આપી શક્યો નહોતો. ક્રાઈમ બ્રાન્ચ ની ઊંડાણપૂર્વકની પૂછપરછ માં આરોપીએ આ મોબાઈલ પોતાના અન્ય સાગરીતો પાસેથી સસ્તા ભાવે ખરીદ્યા હોવાની કબુલાત કરી હતી.આરોપીએ ક્રાઈમ બ્રાન્ચ ને જણાવ્યું હતું કે, પોતાના સાગરીતો સુરત શહેરમાં અલગ અલગ વિસ્તારોમાં રસ્તે ચાલતા રાહદારીઓ પાસેથી મોબાઈલ ચોરી અને સ્નેચિંગ કરી ત્યારબાદ આ મોબાઈલ તેણે સસ્તા ભાવે વેચાણ કરે છે.પોતે મોબાઈલ રીપેરીંગ નો ધંધો કરતો હોવાથી ચોરી અને સ્નેચિંગ કરેલા આ મોબાઈલ પોતાની દુકાને આવતા ગ્રાહકોને ઊંચા ભાવે વેચી પોતાના મોજ-શોખ પૂરા કરે છે. સુરત ક્રાઈમ બ્રાંચ ના હાથે ઝડપાયેલ આરોપીની પુછપરછ પુણા અને રાંદેર પોલીસ ચોપડે નોંધાયેલા મોબાઈલ ચોરીના બે ગુનાઓના ભેદ પણ ઉકેલાઈ ગયા હતા. જ્યારે આરોપી અગાઉ પણ અડાજણ પોલીસ ના હાથે મોબાઈલ ચોરીના ગુનામાં ઝડપાઈ ચુક્યો છે.હાલ આરોપીની ધરપકડ કરી આગળની કાર્યવાહી સુરત ક્રાઈમ બ્રાન્ચે હાથ ધરી છે.
