લંડન સાયન્સ મ્યુઝિયમ ખાતે અદાણી ગ્રીન દ્વારા વૈશ્વિક ઊર્જા સંવાદનું આયોજન: સાગર અદાણીએ ઝડપી વીજળીકરણની હિમાયત કરી

લંડન સાયન્સ મ્યુઝિયમ ખાતે અદાણી ગ્રીન દ્વારા વૈશ્વિક ઊર્જા સંવાદનું આયોજન: સાગર અદાણીએ ઝડપી વીજળીકરણની હિમાયત કરી
લંડન/ભારત : ઊર્જા સુરક્ષાને મજબૂત બનાવવા અને આર્થિક વિકાસને ટેકો આપવા માટે વૈશ્વિક સ્તરે ઝડપી વીજળીકરણ હાથ ધરવું અનિવાર્ય બન્યું છે. લંડનના પ્રતિષ્ઠિત સાયન્સ મ્યુઝિયમ ખાતે આયોજિત વૈશ્વિક ઊર્જા સંવાદમાં અદાણી ગ્રીન એનર્જી લિ.ના એક્ઝિક્યુટિવ ડિરેક્ટર શ્રી સાગર અદાણીએ આ બાબત પર વિશેષ ભાર મૂક્યો હતો. તેમણે જણાવ્યું હતું કે વિશ્વસનીય, સસ્તી અને ચોવીસ કલાક સ્વચ્છ ઊર્જા પહોંચાડવા માટે સંગ્રહ ક્ષમતા (સ્ટોરેજ) સાથેની સંકલિત નવીનીકરણીય ઊર્જા ભવિષ્યમાં મહત્વની ભૂમિકા ભજવશે.
લંડન આબોહવા કાર્યવાહી સપ્તાહ (London Climate Action Week) ના ઉદ્ઘાટન પ્રસંગે ઊર્જા સંક્રમણ કમિશન (ETC) અને અદાણી ગ્રીન એનર્જી લિ.ના સંયુક્ત ઉપક્રમે આ કાર્યક્રમ યોજાયો હતો. આ સંવાદમાં વૈશ્વિક નીતિ નિર્માતાઓ, રોકાણકારો, વ્યવસાયિક અગ્રણીઓ અને આબોહવા નિષ્ણાતોએ હાજરી આપી હતી.
ઊર્જા સંગ્રહ અને ખાવડા પ્રોજેક્ટની મહત્તા
શ્રી સાગર અદાણીએ ઊર્જા સુરક્ષા, પોષણક્ષમતા અને ટકાઉપણુંને વર્તમાન સમયના નિર્ણાયક પડકારો ગણાવ્યા હતા. તેમણે ઉમેર્યું કે:
“બેટરી એનર્જી સ્ટોરેજ સિસ્ટમ્સ (BESS) અને પમ્પ્ડ સ્ટોરેજ પ્રોજેક્ટ્સ (PSPs) જેવી ટેકનોલોજી નવીનીકરણીય ઊર્જાની સંપૂર્ણ ક્ષમતાનો ઉપયોગ કરવા સક્ષમ બનાવે છે.”
અદાણી ગ્રીન ગુજરાતના ખાવડા ખાતે વિશ્વના સૌથી મોટા નવીનીકરણીય ઊર્જા પ્લાન્ટ મારફત ૨૦૩૦ સુધીમાં ૫૦ ગીગાવોટ ક્ષમતા હાસલ કરવા તરફ આગળ વધી રહી છે, જ્યાં સ્વચ્છ ઊર્જાને મોટા પાયે સ્ટોરેજ સાથે સંકલિત કરવામાં આવી રહી છે.
વૈશ્વિક અગ્રણીઓની ઉપસ્થિતિ અને ચર્ચા
ETC ના સહ-અધ્યક્ષ લોર્ડ એડેર ટર્નર અને યુકે ક્લાઇમેટ ચેન્જ કમિટીના અધ્યક્ષ શ્રી નિગેલ ટોપિંગની અધ્યક્ષતામાં બે ઉચ્ચ-સ્તરીય સત્રો યોજાયા હતા. આ સત્રોમાં ઓક્ટોપસ એનર્જી, સ્નેડર ઇલેક્ટ્રિક અને અદાણી ગ્રુપના વરિષ્ઠ અધિકારીઓએ ઊર્જા, ફાઇનાન્સ અને ટેકનોલોજી અંગે ચર્ચા કરી હતી. લોર્ડ ટર્નરે જણાવ્યું કે અર્થતંત્રનું વીજળીકરણ અને વીજ ઉત્પાદનને ડીકાર્બોનાઇઝ કરવું એ સમયની માંગ છે. પરિવહન અને બાંધકામ જેવા ક્ષેત્રોમાં વીજળીકરણ પહેલેથી જ કરકસરયુક્ત સાબિત થઈ રહ્યું છે.
અદાણી ગ્રુપનું વિશાળ રોકાણ અને ભવિષ્યની યોજનાઓ
વધતી જતી ડિજિટલ અર્થવ્યવસ્થા, આર્ટિફિશિયલ ઇન્ટેલિજન્સ (AI) અને ડેટા સેન્ટરોના કારણે વીજળીની વૈશ્વિક માંગ ઝડપથી વધી રહી છે. આ માંગને પહોંચી વળવા માટે અદાણી સમૂહે ઊર્જા સંક્રમણ ક્ષેત્રે ૧૦૦ બિલિયન યુએસ ડોલરથી વધુનું રોકાણ કર્યું છે.
તાજેતરમાં અદાણી સમૂહની વાર્ષિક સામાન્ય સભામાં ચેરમેન શ્રી ગૌતમ અદાણીએ ભારતની ઊર્જા જરૂરિયાતો સંતોષવા ગ્રુપની પ્રતિબદ્ધતા દોહરાવી હતી. અદાણી જૂથે નવીનીકરણીય ઊર્જાના પૂરક તરીકે ૧૦ ગીગાવોટની પરમાણુ ઊર્જા (Nuclear Energy) ક્ષમતા વિકસાવવાની યોજનાની પણ જાહેરાત કરી છે, જે દેશને સસ્તી અને ઓછા કાર્બનવાળી વીજળી પૂરી પાડશે. આ વૈશ્વિક સંવાદ અદાણી ગ્રીન સમર્થિત સાયન્સ મ્યુઝિયમની ઊર્જા ગેલેરીની મુલાકાત સાથે સંપન્ન થયો હતો.