- અદાણી સમૂહની બેજોડ પહેલ:
ગૌતમ અદાણીના જન્મદિને દેશવ્યાપી રક્તદાન પર્વમાં ૫૨,૩૦૬ યુનિટ લોહી એકત્રિત, ગ્રામીણ સ્ટાર્ટ-અપ્સ માટે ‘વંદે ભારતમ’ યોજના જાહેર
અમદાવાદ : અદાણી સમૂહના ચેરમેન શ્રી ગૌતમ અદાણીના ૬૪મા જન્મદિન (૨૪ જૂન) નિમિત્તે અદાણી ફાઉન્ડેશન દ્વારા દેશવ્યાપી સ્તરે કરુણા, સેવા અને આર્થિક ઉત્થાનના બે ઐતિહાસિક લોક-કલ્યાણકારી કાર્યોનો આરંભ કરવામાં આવ્યો છે. “સેવા હી સાધના હૈ” ની ફિલસૂફીને સાર્થક કરતા ફાઉન્ડેશને એક જ દિવસમાં ૫૨,૩૦૬ યુનિટ રક્ત એકત્રિત કરવાનો નવો રેકોર્ડ સર્જ્યો છે, જ્યારે બીજી તરફ દેશના અંતરિયાળ વિસ્તારોના પ્રતિભાશાળી સંશોધકોને વૈશ્વિક મંચ આપવા માટે ‘વંદે ભારતમ’ રાષ્ટ્રવ્યાપી ઝુંબેશની પણ જાહેરાત કરવામાં આવી છે.
રક્તદાન મહાકુંભ: ૧.૫૬ લાખ દર્દીઓને મળશે નવજીવન
વર્ષ ૨૦૧૧માં માત્ર ૧,૩૦૦ યુનિટથી શરૂ થયેલી અદાણી ફાઉન્ડેશનની રક્તદાન પરંપરા આજે ભારતના સૌથી મોટા સ્વૈચ્છિક રક્તદાન અભિયાનમાં ફેરવાઈ ગઈ છે. આ વર્ષે ૨૧ રાજ્યો, ૫ કેન્દ્રશાસિત પ્રદેશો અને ૪ આંતરરાષ્ટ્રીય સ્થળોના ૭૫૪થી વધુ શહેરોમાં ફેલાયેલી ૭૬૪ બ્લડ બેંકોના સહયોગથી આયોજિત આ ઝુંબેશમાં ગત વર્ષના ૨૮,૦૯૦ યુનિટના રેકોર્ડને તોડીને કુલ ૫૨,૩૦૬ યુનિટ (આશરે ૨૩,૫૩૮ લિટર) રક્ત એકત્રિત કરાયું હતું.
અદાણી ગ્રુપના ડોક્ટરો અને પેરામેડિક્સ સહિત ૬,૦૦૦થી વધુ સ્વયંસેવકોની મહેનતથી સફળ બનેલા આ અભિયાન અંગે ફાઉન્ડેશનના ચેરપર્સન ડૉ. પ્રીતિ અદાણીએ તમામ દાતાઓ પ્રત્યે આભાર વ્યક્ત કર્યો હતો. આ રક્ત થકી દેશના ૧,૫૬,૯૧૮થી વધુ દર્દીઓને કટોકટીની સારવાર અને સર્જરીમાં નવું જીવન મળશે.
‘વંદે ભારતમ’: ગ્રામીણ ભારતની કોઠાસૂઝને ‘લોકલ થી ગ્લોબલ’ બનાવવાની નેમ
રક્તદાન પર્વની સાથે જ દેશની સ્ટાર્ટ-અપ ક્ષેત્રની એક મોટી ખાઈ પૂરવા માટે ગૌતમ અદાણીએ એક અત્યંત મહત્વકાંક્ષી યોજના ‘વંદે ભારતમ’ લોન્ચ કરી છે. હાલમાં દેશના ૮૦% સફળ સ્ટાર્ટ-અપ્સ માત્ર ૫ મોટા મેટ્રો શહેરો પૂરતા મર્યાદિત છે. આ ભૌગોલિક અસમાનતાને દૂર કરવા માટે દેશના તમામ ૩૬ રાજ્યો અને ૮૦૦થી વધુ જિલ્લાઓના અંતરિયાળ ગામડાઓ અને નાના શહેરોમાં છુપાયેલી વ્યાપારી અને તકનીકી પ્રતિભાઓને આ પ્લેટફોર્મ પૂરું પાડવામાં આવશે.
પોતાના સંઘર્ષના દિવસોને યાદ કરીને શ્રી ગૌતમ અદાણીએ જણાવ્યું હતું કે, “હું આજે જે કંઈ પણ છું અને મેં જે મેળવ્યું છે, તે મને ભારતની માટીએ આપ્યું છે. જો હું શૂન્યમાંથી આ મુકામ પર પહોંચી શકું છું, તો દેશનો કોઈ પણ નાગરિક કરી શકે છે.”
કોઈ લાયકાતની શરત નહીં, સીધી જ મળશે તક
આ યોજનાની સૌથી મોટી ખાસિયત એ છે કે આમાં જોડાવા માટે કોઈ રજિસ્ટર્ડ કંપની કે મોટી શૈક્ષણિક લાયકાત હોવી જરૂરી નથી. કૃષિ, પરંપરાગત હસ્તકલા અને ટકાઉ વિકાસ જેવા સ્થાનિક વિષયો પર સચોટ નવો આઈડિયા કે પ્રોટોટાઇપ ધરાવતી કોઈપણ વ્યક્તિ સીધી જ vandebharatam.org પોર્ટલ પર અરજી કરી શકશે. ખાસ કરીને મહિલાઓ, આદિવાસીઓ અને દિવ્યાંગ ઉદ્યોગસાહસિકોને આમાં વિશેષ પ્રોત્સાહન અપાશે.
પ્રાદેશિક સ્તરે કડક મૂલ્યાંકન બાદ દેશભરમાંથી ૭૫ શ્રેષ્ઠ પ્રતિભાઓની પસંદગી કરવામાં આવશે. આ વિજેતાઓને અમદાવાદ ખાતે ખાસ ઇન્ક્યુબેશન સપોર્ટ, ફંડિંગ, અને ઉદ્યોગજગતના દિગ્ગજોનું સીધું માર્ગદર્શન પૂરું પાડવામાં આવશે. આગામી સ્વાતંત્ર્ય પર્વની આસપાસ આ કાર્યક્રમની ‘ગ્રાન્ડ ફિનાલે’ યોજાશે જેમાં વિજેતાઓને રોકડ પુરસ્કારોથી નવાજવામાં આવશે. વર્ષ ૨૦running૪૭ સુધીમાં ભારતને વિકસિત રાષ્ટ્ર બનાવવાના લક્ષ્યમાં આ બંને પહેલો દેશના સામાજિક અને આર્થિક વિકાસ માટે સીમાચિહ્નરૂપ સાબિત થશે.
